ဝေဖန်သူတွေကို ဘယ်လိုတုံ့ပြန်ရမလဲမပြောခင် ကျွန်တော်ကိုယ်တိုင် ဝေဖန်သူတွေကို ဘယ်လိုတုံ့ပြန်ခဲ့ဖူးလဲနဲ့ မျှဝေပေးချင်ပါတယ်။ ကျွန်တော်ကိုယ်တိုင် လူတွေရဲ့ ရှေ့တစ်မျိုး ကွယ်ရာတစ်မျိုး ဝေဖန်တာ ခံခဲ့ရဖူးပါတယ်။ အဓိက သူတို့ဝေဖန်တာက ကိုယ့်ရဲ့ကြိုးစားမှုရလဒ်တွေအပေါ် မုဒိတာမပွားနိုင်ကြဘဲ အပြုသဘောမဟုတ်တဲ့ အပျက်သဘောရှုမြင်မှုမျိုးနဲ့ ဝေဖန်ကြတာမျိုးပါ။
ကျွန်တော် အသက် ၂၆ နှစ်မှာ ဇာတိရပ်ရွာကနေ လက်ရှိနေထိုင်ရာမြို့ကို စတင်ပြောင်းရွှေ့လာတဲ့အခါ ခြံတစ်ကွက်စတင်ဝယ်ယူလိုက်ပါတယ်။ အလုပ်အကိုင်လုပ်ဖို့ အရင်းအနှီးကလည်း လက်ထဲမှာမကျန်တော့လောက်တဲ့အခြေအနေနဲ့ လုပ်ငန်းလုပ်ဖို့ အခက်တွေ့ခဲ့ရပါတယ်။ အရင်းအနှီးမရှိ မအောင်မြင်သေးခင် ဒီလိုအချိန်မှာ ကိုယ့်ကို အဖက်မလုပ်ချင်ကြတဲ့ လုပ်ငန်းရှင်တွေချည်းပါပဲ။
တစ်နေ့မှာတော့ ကိုယ့်ကိုခင်မင်ရင်းနှီးတဲ့ မိတ်ဆွေများစွာထဲကတစ်ဦးက စတင်ပြီး လုပ်ငန်းတစ်ခုကို အတူလုပ်ဖို့တွဲခေါ်ပါတယ်။ ကိုယ်တိုင်ကလည်း အလုပ်လုပ်နေရင်ပျော်နေတတ်သူ မပျင်းမရိတတ်သူမို့ အဲဒီလုပ်ငန်းဟာ ၂ နှစ်အတွင်း ဝေဖန်သူတွေ၊ အဖက်မလုပ်သူတွေ ထင်မှတ်မထားတဲ့ အောင်မြင်မှုမျိုးရရှိခဲ့ပါတယ်။ အဲဒီအချိန်ကစပြီး ကိုယ့်ကို အရင်ကအဖက်မလုပ်ခဲ့တဲ့သူတွေ စပြီးမျက်စိကျလာတဲ့ လုပ်ငန်းရှင်ဘဝကို ရောက်လာပါတယ်။
ဒီလိုလုပ်ငန်းမျိုးကို နှစ်ပေါင်းဆယ်ချီလုပ်ကိုင်ပြီး မရသေးသူတွေကြားမှာ အချိန်တိုအတွင်း ကိုယ်ကအောင်မြင်အောင်လုပ်ပြီး ရယူနိုင်ခဲ့တဲ့အခါ ဝေဖန်သူတို့ ဘာပြောကြသလဲဆိုရင် "ဒီကောင် ကြက်ကန်းဆန်အိုးတိုးသွားတာပါ၊ ကြည့်နေ မကြာခင် ပြန်ပြုတ်လိမ့်မယ်" စသဖြင့် သူတို့တွေဟာ လူတစ်ဖက်သားရဲ့ကြိုးစားမှုကို အသိအမှတ်ပြု လက်ခံနိုင်စွမ်းထက် အပျက်သဘောရှူမြင် အပြစ်ရှာတတ်ကြပါတယ်။
အဲဒီလို ဝေဖန်ခံရချိန်မှာ ကျွန်တော့်ခေါင်းထဲဝင်လာတာက "သူတို့ကို တုန့်ပြန်နိုင်စရာနည်းလမ်းက တစ်ခုပဲရှိတော့တယ်၊ အဲဒါ ငါပိုပြီးအောင်မြင်အောင်လုပ်ပြဖို့" ဆိုတာပါပဲ။
ကျွန်တော်က ငယ်ငယ်လေးကတည်းက အများကိုကူညီရတဲ့အလုပ်ကို ဝါသနာတစ်ခုလိုဖြစ်ခဲ့သူဆိုတော့ စီးပွားရေးအပြင် လူမှုရေးလုပ်ငန်းတွေဘက်မှာလည်းပါဝင်ဦးဆောင်လုပ်ကိုင်ရင်း အချိန်တိုအတွင်းမှာ စီးပွားရေးသာမက လူမှုရေးဘက်မှာလည်း အတိုင်းအတာတစ်ခု အသိအမှတ်ပြုလာကြတော့ ဝေဖန်သူတွေ အသံတိုးသွားကြတယ်။
လောကဓံအလှည့်အပြောင်းတစ်ခုရောက်ပြန်တော့ အမှန်တရားကိုမြတ်နိုးတတ်၊ အများအတွက် ကူညီရတာကျေနပ်နေတတ်တဲ့ ကျွန်တော်အဖို့ ယခုစာဖတ်နေသူအများစု ကြုံတွေ့ကြရတဲ့ အမှန်တရားနဲ့မထိုက်တဲ့ပတ်ဝန်းကျင်ကြောင့် ကြီးကြီးမားမားဆုံးရှုံးနစ်နာမှုတွေ ကြုံခဲ့ရဖူးပါတယ်။ ဒီအချိန်မှာ ဝေဖန်သူတွေ အသံပြန်ထွက်လာပြန်ပါတယ်။ "တွေ့လား ဒီကောင် အခုတော့ ဒုက္ခရောက်ပြီ၊ ဘဝပျက်ပြီမို့လား" စသဖြင့် ကွယ်ရာမှာကျွန်တော့်အကြောင်း ဝေဖန်ပြောကြတယ်လို့ ကြားသိရပါတယ်။ ဒီအသံတွေကပဲ ကျွန်တော့အတွက် ခွန်အားကြီးပြန်ဖြစ်လာပြန်တော့တယ်။
အလုပ်တစ်ခုကို လွယ်လွယ်လက်မလျှော့တတ်တဲ့ ကိုယ့်ရဲ့အကျင့်၊ လောကဓံကို မိတ်ဆွေအဖော်တစ်ယောက်လို သဘောထားတဲ့ ယုံကြည်ချက်၊ အလုပ်တစ်ခုခုကိုလုပ်ရင် အောင်မြင်တဲ့အထိ စိတ်ရှည်ရှည်လုပ်ကိုင်တတ်တဲ့ ဇွဲလုံ့လ၊ ကိုယ့်အလုပ်ကို တန်ဖိုးထားတတ်တဲ့ စိတ်ဓာတ်၊ သူတစ်ပါးအကြောင်းနဲ့ ဘယ်တော့မှ အချိန်ကုန်မခံတတ်တဲ့သူ၊ စီးပွားရေး လူမှုရေး နိုင်ငံရေး ဘာသာရေး အစရှိတဲ့နယ်ပယ်တွေမှာ ထိုက်သင့်တဲ့အတွေ့အကြုံရထားတဲ့ အကျိုးကျေးဇူး၊ ခေတ်နဲ့စနစ်ကို မျက်ခြေမပြတ် အမီလိုက်နိုင်အောင် အမြဲကြိုးစားနေတဲ့ လေ့လာမှု ဒါတွေဟာ ဝေဖန်သူတွေ အသံပြန်တိတ်သွားစေတဲ့ အချက်တွေပဲဖြစ်ပါတယ်။
မိတ်ဆွေတို့ကို ပြောချင်တာက ဝေဖန်သူတွေက သူတို့အလုပ် သူတို့လုပ်နေကြမှာပါပဲ။ အပြုသဘော၊ အပျက်သဘော ဆိုပြီးဝေဖန်မှုပုံစံ ၂ မျိုးရှိပါတယ်။ အပြုသဘောနဲ့ ဝေဖန်တာမျိုးက အကြံပြုချက်ပါတာမို့ လက်ခံပေးရမှာဖြစ်ပါတယ်။ ဥပမာ လူတစ်ယောက်က ကိုယ့်ကွယ်ရာမှာ "ဒီအောင်မြင်မှုမျိုးကို သူမထိန်းနိုင်မှာ၊ အောင်မြင်မှုကြောင့် ဘဝမေ့ ဘဝင်မြင့်သွားရင်တော့ ဒီကောင် ဒုက္ခရောက်မှာ" စသဖြင့် ဝေဖန်မှုမျိုး။ ဒီဝေဖန်မှုကိုကြည့်ရင် အပြုသဘောဆောင်ပြီး ကိုယ့်အတွက် သတိပြုဆင်ခြင်စရာတွေပါ ပါဝင်တဲ့ အကြံပြုချက်သဘောဆောင်ပါတယ်။ အပျက်သဘောနဲ့ ဝေဖန်မှုတွေကိုတော့ ဒီဘက်နားကဝင် ဟိုဘက်နားကထွက်စနစ်နဲ့ ခွန်အားအဖြစ်အသုံးချပြီး ပိုကြိုးစားဖို့သာလုပ်ပါ။ သူတို့ဝေဖန်မှုဆိုတာဟာ ကိုယ့်ရဲ့ကြိုးစားမှုကို ရပ်တန့်နိုင်စွမ်းရှိတဲ့အရာမဟုတ်ပါဘူး။ ကိုယ်တိုင်ကသာ ကိုယ့်ကြိုးစားမှုကို ရပ်တန့်နိုင်တာမျိုးပါ။ သူတို့ဝေဖန်လို့လည်း ကိုယ့်ကြိုးစားမှုကိုမရပ်တန့်သရွေ့ ကိုအောင်မြင်မှုက လျော့ကျသွားမှာမဟုတ်ပါဘူး။ကိုယ်တိုင်ကမကြိုးစားပဲ သူတို့သေလောက်အောင်ချီးမွမ်းနေလည်း ကိုယ့်အောင်မြင်မှုက တိုးလာမှာမဟုတ်ပါဘူး။
"ဝေဖန်သူတွေ အကြောက်ဆုံးအရာက ကိုယ့်ရဲ့ ပိုတိုးတိုးလာတဲ့ အောင်မြင်မှုပါ"။
နောက်တစ်ခုက ကျွန်တော်တို့ဟာ ဝေဖန်သူတွေဖြစ်စေချင်သလို ဖြစ်ခွင့်ပေးလိုက်ရင် ဒါဟာ ကိုယ့်ဘဝကို ဝေဖန်သူလက်ထိုးအပ်ပြီး အဆုံးသတ်လိုက်တာပါပဲ။ လူတိုင်းဟာ ကိုယ့်ဘဝကိုယ်ပိုင်ကြသလို ကိုယ်ဖြစ်ချင်တဲ့ပုံစံ ကိုယ်တိုင်ဖန်တီးခွင့်ဆိုတာ ဘဝကြီးက လွတ်လပ်စွာပေးထားပြီးသားပါ။ သူတို့ဝေဖန်တာကို ခွန်အားအဖြစ်ပြောင်းပြီး အောင်မြင်သာကြိုးစားပြလိုက်ပါ။ "ကျွန်တော်ဝေဖန်သူတွေကို အကောင်းဆုံးပြန်လည်တုံ့ပြန်နည်းကတော့ သူတို့ဖြစ်စေချင်တာထက် အစပေါင်းများစွာ အောင်မြင်ပြနေခြင်းပါပဲ"။
U AUNG -LGTI
0 Comments:
Post a Comment